Vegna skriðuhættu á Seyðisfirði: Rýming endurskoðuð 28. desember

25. desember 2020 16:39

Tilkynning frá almannavarnadeild ríkislögreglustjóra og lögreglustjóranum á Austurlandi:

  • Áfram hættustig á Seyðisfirði og rýmingar að hluta í gildi vegna skriðuhættu.
  • Rýmingar verða endurskoðaðar 28. desember.
  • Fylgst er vel með aðstæðum ofan Eskifjarðar

Eskifjörður: 
Veðurstofa Íslands hefur ásamt samstarfsaðilum sett upp vefmyndavél sem beint er að sprungum sem mynduðust í gamla Oddsskarðsveginum í síðustu viku.  Auk þess eru fastpunktar mældir einu sinni á dag til þess að athuga hvort vart verði við hreyfingar í hlíðinni. Það er gert til þess að geta brugðist við ef aðstæður breytast á næstu dögum.  Síðustu mælingar benda þó til þess að allt sé með kyrrum kjörum.

Seyðisfjörður:
Síðasta sólahring var fylgst sérstaklega vel með aðstæðum á Seyðisfirði vegna hlýinda sem gengu yfir.  Engar tilkynningar bárust um skriður eða drunur.  Þá sýndu mælingar í morgun að lítil sem engin hreyfing hafi orðið á upptakasvæðum skriðufalla frá því í gær.  Á morgun verður kalt, en búast má við hríðarveðri sem færist yfir í rigningu með 15-20 m/s á  á sunnudag, 27. desember.  Um kvöldið kólnar aftur með snjókomu.  Að þessum sökum mun endurkoðun á rýmingarsvæðinu ekki fara fram fyrr en á mánudaginn 28. desember og niðurstöðu má vænta seinni part mánudags.   Á meðan veðrið gengur yfir má búast við erfiðri færð á Fjarðarheiði og fóllk því beðið að fylgjast vel með færð á vegum og viðvörunum á www.vedur.is og www.vegag.is.

Staðan er metin daglega og yfirfarin á samráðsfundi almannavarnadeildar ríkislögreglustjóra, lögreglunni á Austurlandi, Veðurstofu Íslands, sveitarfélögum og öðrum viðeigandi aðilum. Tilkynninga frá þeim fundum má vænta seinni part hvers dags.  Þær verða sendar fjölmiðlum, og birtar á vefsíðum og á samfélagsmiðlum lögreglunnar á Austurlandi og almannavarnadeildar RLS.  (www.logreglan.is og www.almannavarnir.is).  Ef aðstæður breytast hratt munu tilkynningar þess efnis verða sendar út.

Þjónustumiðstöð almannavarna opnar næst í Herðubreið 27. desember kl 11, en yfir jólin er hægt að senda inn fyrirspurnir á netfangið sey@logreglan.is  og ef erindið er brýnt má hringja í 839 9931. 

Síðast uppfært: 25. desember 2020 klukkan 16:39