Það er vilji Almannavarna og Grindavíkurbæjar að allir, jafnt íbúar sem fyrirtæki fái tækifæri til að gæta að eignum sínum og einnig ef þau óska að flytja þær annað.
Eins og fram hefur komið þá hefur í tvo daga aðgengi að Grindavík verið stýrt með skipulögðum hætti. Með því er reynt að tryggja öryggi allra og veita ákveðinn fyrirsjáanlega en um leið gæta meðalhófs og jafnræðis í aðgerðum. Áður hefur verið kynnt að fyrirtæki gætu skráð sig inn á island.is, við skipulagningu komu ýmsir hnökrar upp og því frestaðist það til dagsins í dag.
Fyrirtæki sem óska eftir heimild fyrir aðgengi að Grindavík geta nú að sent beiðni í gegnum island.is. Ábyrgðaraðili viðkomandi fyrirtækis skráir sig inn, fyllir út umsóknina og sendir. Þegar umsókn er móttekin munu umsóknaraðilar fá staðfestingarpóst vegna viðtöku umsóknar. Í framhaldi verður farið yfir umsóknina og umsóknaraðila úthlutað tíma til aðgerða. Umsóknaraðili mun þá í framhaldi fá sendan póst með QR kóða og tímabili sem viðkomandi fyrirtæki hefur aðgang að eignum sínum. Einn QR kóði er sendur fyrir hvern starfsmann eða aðila sem þarf að fara inn í Grindavík á vegum umsækjanda, en það er nauðsynlegt svo hægt sé að halda utan um fjölda fólks í bænum hverju sinni. Allir sem hafa fengið úthlutað QR kóða þurfa að skrá sig inn við komuna til Grindavíkur og út úr bænum við brottför.
Í einstaka tilfellum getur verið að upplýsingar í umsókninni séu ófullnægjandi og þá hefur fulltrúi Almannavarna samband við umsóknaraðila og óskar eftir frekari upplýsingum. Fyrirtæki eru beðin um að notast eingöngu við island.is vegna heimilda og aðstoðar vegna aðgangsmála og verðmætavitjunar. Þetta er gert svo hægt sé að halda utan um allar beiðnir og samskipti á einum stað.
Í umsóknarferlinu er boðið upp á tvær leiðir. Annars vegar fyrir umfangsminni flutninga, bílar undir 5 tonnum, og hins vegar fyrir þyngri flutninga, bílar yfir 5 tonnum. Fyrir þá aðila sem sækja um umfangsminni flutninga með sendbílum og/eða vilja nota fólksbíl / jeppa ásamt kerru til flutninga þurfa að gefa upp upplýsingar um fjölda ökutækja ásamt lista yfir þá einstaklinga sem munu koma að flutningunum. Þessi leið hentar best t.d. iðnaðamönnum og smærri fyrirtækjum.
Þyngri flutningar eru fyrir flutninga á stærri farartækjum (meira en 5 tonna heildarþungi faratækja). Þar er óskað eftir lýsingu á farmi, áætlaðri heildarþyngd ökutækja með farmi, áætlaðan öxulþunga ásamt áætluðum fjölda bíla. Einnig þarf að skila inn lista yfir þá einstaklinga sem munu koma að flutningunum.
Aðkoma og umferðarleiðir við flutninga taka mið af ástandi vega og annara aðstæðna innanbæjar en þær geta verið breytilegar milli daga. Ef fleiri en fimm einstaklingar eru áætlaðir við flutninga skal senda lista sem inniheldur nafn, kennitölu, netfang og símanúmer viðkomandi til Almannavarna á netfangið beidnir@almannavarnir.is
Í öllum tilfellum skal taka fram hvort um sé að ræða flutning á hættulegum farmi eða ekki. Umsóknir sem berast eftir kl. 16.00 eru afgreiddar daginn eftir. Umsóknir eru afgreiddar eins fljótt og hægt er, en álag á kerfið getur valdið töfum í afhendingu QR kóða. Mælt er með því að fyrirtæki sæki tímanlega um aðgang en sem stendur er unnið úr innsendum umsóknum alla daga vikunnar. Vert er að taka fram að þættir eins og veður eða breytt hættumat og aðstæður geta haft áhrif á tímasetningar og fyrirkomulag flutninga.
Staðfestingarpóstur sem sendur verður þegar búið er að óska eftir aðgangi er með eftirfarandi hætti:
Umsókn þín hefur verið móttekin. Með því er staðfest að þú fáir úthlutaðan tíma þegar aðstæður leyfa. Ef það þarf að breyta innsendri umsókn er mikilvægt að gera ekki nýja umsókn heldur svara þessum staðfestingarpósti með upplýsingum um breytingar. Þegar beiðnin hefur verið yfirfarin er sendur tölupóstur þess efnis með upplýsingum um hvenær á að koma og í framhaldinu er sendur QR kóði á alla sem tengjast umsókninni. Honum þarf að framvísa við lokunarpóst til Grindavíkur. QR kóðinn er sendur til allra kvöldið áður en farið er inn til Grindavíkur. Mjög mikilvægt er að kóðinn hafi skilað sér til allra áður en farið er til Grindavíkur.
Þegar komið er til Grindavíkur getur verið hjálplegt að hafa þessi samskipti aðgengileg ef koma upp spurningar eða vandamál. Athugið: Ef ekki hefur borist staðfesting mælum við með að fólk skoði ruslpóstinn.